Mae Deddf Hapchwarae 2005 yn creu system newydd ar gyfer trwyddedu a rheoli hapchwarae masnachol yn y wlad hon.
Ymhlith newidiadau eraill, mae’n rhoi cyfrifoldebau newydd a helaethach i awdurdodau lleol ym maes trwyddedu safleoedd hapchwarae. Mewn rhai achosion (megis mewn arcedau peiriannau hapchwarae), mae’r rheiny’n ychwanegol at eu cyfrifoldebau presennol.
Y Polisi Hapchwarae Deddf Hapchwarae 2005.doc
Fodd bynnag mewn meysydd pwysig eraill, gan gynnwys betio, hapchwarae mewn casino a bingo, maent yn trosglwyddo i’r awdurdodau lleol gyfrifoldebau a oedd gynt yn gyfrifoldebau’r ynadon trwyddedu lleol.
1. Bydd y Comisiwn Hapchwarae yn gyfrifol am roi trwyddedau gweithredu a thrwyddedau personol i weithredwyr hapchwarae masnachol ac i bersonél sy’n gweithio yn y diwydiant. Bydd hefyd yn rheoleiddio rhai hyrwyddwyr a rheolwyr loteri.
Swyddogaethau’r Awdurdodau Trwyddedu
2. Mae’r Ddeddf yn rhoi i awdurdodau lleol nifer o swyddogaethau rheoleiddio pwysig mewn perthynas â hapchwarae. Y canlynol fydd eu prif swyddogaethau:
- Trwyddedu safleoedd sy’n cynnig gweithgareddau hapchwarae;
- Ystyried hysbysiadau a roddwyd i ddefnyddio safleoedd at ddibenion hapchwarae, dros dro;
- Rhoi hawlenni ar gyfer hapchwarae a pheiriannau hapchwarae mewn clybiau a chanolfannau lles y glowyr;
- Rheoleiddio hapchwarae a pheiriannau hapchwarae mewn safleoedd sydd â thrwydded i werthu alcohol;
- Rhoi hawlenni i ganolfannau adloniant i’r teulu a hynny ar gyfer defnyddio rhai peiriannau hapchwarae lle mentrir symiau bach;
- Rhoi hawlenni ar gyfer cynnig gwobrwyon;
- Ystyried hysbysiadau defnydd achlysurol ar gyfer betio ar draciau; a
- Chofrestru loterïau’r cymdeithasau bach.
Trwyddedau Safle
3. Bydd trwyddedau safle yn cael eu rhoi gan yr awdurdodau trwyddedu a gallant awdurdodi darparu cyfleusterau yn y lleoedd canlynol:
- Safleoedd Casinos;
- Safleoedd Bingo;
- Safleoedd lle ceir betio, gan gynnwys traciau;
- Canolfannau hapchwarae i oedolion; a
- Chanolfannau Adloniant i’r Teulu.
4. Ac eithrio mewn achosion sy’n ymwneud â thraciau (lle efallai nad y trac-feddiannwr sy’n cael y drwydded safle yw’r un sy’n cynnig yr hapchwarae), ni fydd trwyddedau safle yn cael eu rhoi oni bai fod yr ymgeisydd yn ddeiliad trwydded berthnasol ar gyfer gweithredwr hapchwarae: er enghraifft, i gael trwydded safle bingo, mae’n rhaid i’r ymgeisydd fod yn ddeiliad trwydded gweithredwr bingo. Gellir trosglwyddo trwyddedau safle i rywun arall sy’n ddeiliad trwydded weithredu ddilys.
www.gamblingcommission.gov.uk